Një mbrëmje si kjo

Ka vite që e pres të më vijë

një mbrëmje e flladshme si kjo,

nëpër mahallë shoh fëmijët e bërë t’mdhenj

e dikur i kisha lënë para dyerve të përlyer

gratë e bukura i gjeta plaka me buzëqeshje të trishtë

e burrat, dikur të m’rrolur krenarisht, sot pleq këndshmërisht të butë

Sonte është një prej atyre netëve

që ka vite që pres të më vijë,

yjet nxitojnë të ndriçojnë

Hëna bëhet misterioze e s’paraqitet hiç,

e veç një fllad i lehtë e i ngrohtë

luan me mua, i vetpushtetshëm, hijerëndë…

Mes vitesh u takuam sonte

ky fllad, yjet dhe unë

k’të rast të volitshëm kemi gjet’ të rrëfehemi

kjo është një prezencë që do t’na mungojë

e ne tashmë e dijmë që krejt jeta është flladi që na mbërthen për një çast,

sonte le të shtrëngohemi fort.